Ақмола облысында коронавирус жұқтырғандар саны 5 адамға жетті. Оның үшеуі бір отбасынан екені белгілі болды. Бұл туралы Ақмола облысының өңірлік коммуникациялар қызметінде өткен брифингте мәлім болды, – деп хабарлайды «Aqmola news» ақпарат агенттігі.
Елорданың іргесінде орналасқан Қосшы ауылында тұратын бұл азаматтар осыған дейін де үй карантинінде жатқан. Өйткені, коронавирусқа шалдыққан туыстары осы үйде қонақта болған.
Аталған 3 адам қазір инфекциялық стационарда жатыр. Жағдайлары қанағаттанарлық. Олар: 1954 жылы туған әйел, 1949 жылы туған ер адам және олардың 1990 жылы туған ұлдары. Олардан бөлек, бізде қазір стационарлық карантинде 95 пациент бақыланып жатыр. Барлығының жағдайы қанағаттанарлық, – деді Ақмола облыстық денсаулық сақтау басқармасы басшысының міндетін атқарушы Сүлен Ілиясов.
Қазір аталған науқастардың барлық жақындары мен туыстары ауруханаға жатқызылып, толықтай бақылауға алынды.
