Ұлттық шұғыл медицинаны үйлестіру орталығының төрағасы Біржан Оспанов Өскемен маңында апатты жағдайда қонған ұшақ жолаушыларының денсаулығы жайлы айтты,-деп хабарлайды Aqmola News ақпарат агенттігі Tengrinews.kz-ке сілтеме жасап.
«Бортта дәрігер, фельдшер және екі ұшқыш болған. Олар көмек көрсетуге бара жатқан, сондықтан ішінде науқас болмаған. Оқиғадан соң барлық төрт адам Өскемендегі №1 қалалық ауруханаға жеңіл жарақатпен жеткізілді», – дейді Біржан Оспанов берген сұхбатында.
Айта кетейік, Өскемен маңындағы Прапорщиково ауылында «Орлан 2000» жеке компаниясына тиесілі ұшақ апатты жағдайда қонды.
Қазақстанның Авиациялық әкімшілігі мәліметіне сүйенсек, түскі сағат 12:50-де экипаж қозғалтқыш жұмысында ақау пайда болғанын хабарлаған. Әуе кемесінің командирі ұшақты Өскемен әуежайынан шамамен 1 жарым шақырым жерде қондыру жөнінде шешім қабылдаған.
Қазір Индустрия және инфрақұрылымдық даму министрлігіне қарасты авиациялық оқиғаларды тергеу басқармасы апатты тергеу жұмыстарын бастады.
