2024 жылдан бері республикалық «Таза Қазақстан» экологиялық акциясы табиғатқа жанашырлықпен қарау идеясын ту еткен мыңдаған бейжай қарамайтын азаматты біріктіріп келеді. Жоба волонтерлік қозғалысты дамытуға және әсіресе жастар арасында экологиялық мәдениетті қалыптастыруға арналған маңызды алаңға айналды. Бұл туралы волонтерлерді қолдау орталығының облыстық фронт-офисінің жетекшісі Дидар Хамзин мәлімдеді.
Облыстық жастар ресурстық орталығының мәліметінше, бүгінде өңірде 60-тан астам ұйымға біріктірілген 3 600-ден астам волонтер белсенді жұмыс атқаруда. Олардың қызметі тоғыз бағытты қамтиды: білім беру, мәдени мұраны сақтау, экология, денсаулық сақтау, «күміс волонтерлік» және басқа да салалар. Соңғы жылдары «Таза Қазақстан» акциясының басталуымен эковолонтерлік бағыт ерекше қарқын алып, жаңа серпінге ие болды.
– Жоба қоғам тарапынан кең қолдауға ие болды. Көптеген белсенділердің айтуынша, Мемлекет басшысы Қасым-Жомарт Тоқаев ұсынған бұл бастама тазалық мәдениеті мен жеке жауапкершілікті қалыптастыруға ықпал етеді. «Егер қоғамды өзгерткің келсе, өзіңнен баста» деген Абайдың сөзі экологиялық қозғалыстың ұранына айналды, – дейді Дидар Хамзин. – «Таза Қазақстан» жобасының басты мақсаты – қоршаған ортаға жауапкершілікпен қарауды тәрбиелеу, патриоттық құндылықтарды және «Адал адам – Адал еңбек – Адал табыс» тұжырымдамасының қағидаттарын насихаттау.
Экологиялық акция кезең-кезеңімен өткізіледі. Мәселен, көктем мезгілінде ол бірнеше аптаға созылып, әр апта белгілі бір тақырыпқа арналды. «Таза өлке» апталығы аясында тұрғындар мен ұйымдар аулалар мен іргелес аумақтарды тазалады. «Киелі мекен» апталығы тарихи-мәдени ескерткіштерді абаттандыруға бағытталса, «Жасыл аймақ» аясында ағаш отырғызу және көгалдандыру жұмыстары жүргізілді. «Өнегелі ұрпақ» акциясы ардагерлерге көмек көрсету мен қарттар үйлерін абаттандыруға арналды. Ал «Мөлдір бұлақ» апталығында волонтерлер өзен-көлдердің жағалауларын тазалады.
Алайда тақырыптық апталықтардың аяқталуымен эковолонтерлердің жұмысы тоқтамайды. Облыстық жастар ресурстық орталығында атап өткендей, өңірдегі барлық волонтерлік ұйымдар бірнеше бағытта, соның ішінде эковолонтерлік бойынша да тұрақты жұмыс жүргізеді. Ең белсенділердің қатарында Көкшетау және Қосшы қалаларының, сондай-ақ Зеренді, Біржан сал және Целиноград аудандарының волонтерлері бар.
“«Феникс», «Альфа», «Esbol Qory», «Мейірім» секілді ірі волонтерлік бірлестіктермен қатар, өңірде экологиялық іс-шараларға – ауқымды сенбіліктерге, экофестивальдер мен плоггингтерге белсенді қатысатын бастамашыл топтар да жұмыс істейді. Ең танымал шаралардың қатарында «Отбасылық ағаш», «Таза жағалау», «Таза парк», «Менің өлкем» акциялары бар. Біздің мақтанышымыз – Целиноград ауданының жастары. Олардың «Жасыл ел» штабы 2025 жылы ел бойынша үздік деп танылды”, – дейді Дидар Хамзин.
Жыл сайын белсенді волонтерлер үшін оқыту семинарлары мен тренингтер ұйымдастырылады. Дәстүрлі түрде Зерендіде еліміздің түкпір-түкпірінен жиналған жастардың қатысуымен волонтерлердің жазғы мектебі өтеді. Мұнда тәжірибелі волонтерлер мен танымал спикерлер өз тәжірибелерімен, сәтті жобаларымен бөліседі. Сонымен қатар облыстық ресурстық орталық өңірдегі волонтерлік орталықтар үшін «Zhas Camp» лагерін ұйымдастырады. Бұл – әртүрлі қала мен ауданнан келген белсенділердің бас қосуы ғана емес, алдағы жоспарларды талқылайтын диалог алаңы.
“Қазақстанның бастамасымен БҰҰ 2026 жылды Халықаралық волонтерлер жылы деп жариялады. Сондықтан алдағы уақытта, оның ішінде эковолонтерлік бағытта да, акмолалық жастар қатысатын тың әрі қызықты жобалар жүзеге асады деп күтеміз. Игі істердің жасы жоқ, ал көзге көрінбейтін майданның сарбаздары жаңа белестерді бағындыруға дайын. Табиғатқа қамқорлық бір ғана акцияның аясымен шектелмеуі тиіс. Тек тұрғындардың тұрақты қатысуы мен экологиялық құндылықтарды келер ұрпаққа жеткізу арқылы ғана туған өлкенің тазалығы мен сұлулығын сақтай аламыз”, – деп атап өтті Дидар Хамзин.
Айта кетейік, «Таза Қазақстан» акциясы басталғалы бері Ақмола облысында 550-ден астам елді мекенде жұмыстар жүргізілді. Осы уақыт ішінде шамамен 80 мың тонна қоқыс шығарылып, бір миллионнан астам ағаш отырғызылды, мыңнан аса балалар ойын алды.
