«AMANAT» партиясының хатшысы Эльдар Жумагазиев Ақмола облысына жұмыс сапары аясында Көкшетауда өңір кәсіпкерлерімен кездесті. Жиынға Ақмола облысы әкімінің орынбасары Ернар Жаркешов және 70-тен астам бизнес өкілі қатысып, орталық мемлекеттік органдар өкілдері бейнебайланыс арқылы қосылды.
Кездесу ашық диалог форматында өтті. Ерейментау ауданынан келген кәсіпкер, облыстық мәслихат депутаты Бекім Әкімов субсидиялардың уақытылы төленбеуі шағын кәсіпкерлерге қиындық тудырып жатқанын және жайылымдық жер тапшылығы мәселесін көтерді. Қосымша білім беру саласындағы кәсіпкерлер мемлекеттік қолдаудың тұрақсыздығын атап өтті. Құрылыс саласындағы кәсіпкерлер де өз салаларына қатысты проблемалар мен ұсыныстарын ортаға салды.
Барлық ұсыныстар мен сұрақтар партия және орталық органдардың бақылауына алынды. Кездесуді қорытындылаған Эльдар Жумагазиев партия жанынан кәсіпкерлер мәселесімен айналысатын үйлестіру кеңесінің құрылғандығын атап өтті. Мұнда кәсіпкерлер мен орталық мемлекеттік органдар арасындағы мәселелер талқыланып, тікелей байланыс орнатуға мүмкіндік бермек.
