«Халық қатысатын бюджет» – Көкшетауды дамыту үшін жаңа мүмкіндіктер. Бұл туралы толығырақ Көкшетау қаласы әкімінің кеңесшісі Махаббат Самрат айтып берді.
– Көкшетау қаласында «Халық қатысатын бюджет» жобасы бірнеше жыл бойы іске асырылып жатыр. Биыл жоба қаңтардың үшінші онкүндігінде басталды. Негізгі мақсат-бюджет процесінің ашықтығын қамтамасыз ету және қала тұрғындарына жергілікті бюджет қаражатын бөлуге қатысуға мүмкіндік беру. Жобаға қатысуға өтінімдерді өз аулалары мен қоғамдық кеңістіктерін абаттандыруға мүдделі Көкшетаудың барлық тұрғындары бере алады. Жоба шеңберінде аумақты көгалдандыру, тротуарларды жайластыру, спорттық, балалар ойын алаңдарын салу және жөндеу сияқты түрлі мақсаттарды таңдауға болады. Жобаның басталғаны туралы хабарландырудан кейін тұрғындар өз жобаларын дайындап, оны қала әкімдігінің сайтына жүктеуі керек. Сараптамалық кеңес келіп түскен жобаларды ережелерге сәйкестігін қарайды, содан кейін дауыс беру кезеңі басталады. Жоба мақұлдануы үшін кем дегенде 50 дауыс жинауы керек. Биыл 50 жоба ұсынылды, оның 10-ы белгіленген ережелерге сәйкес келмеді. Қалған 40 жоба дауыс беру кезеңіне сәтті өтті. Айта кететін жайт, әкімдік бұл кезеңге қатыспайды. Істің нәтижесі тек қатысушылардың, яғни тұрғындардың өздеріне деген ұмтылысына байланысты. Ұсынылған 40 жобаның 19-ы 50-ден астам дауыс жинай алды, енді осы бастамалар бойынша жұмыстар жүргізілуде, – деп хабарлады Махаббат Балғұбайқызы.
Спикердің берген ақпаратына жүгінсек, құрылыс маусым айында басталды. Бүгінгі таңда 10 алаң бойынша жұмыстар аяқталды. Олар барлық сапа мен қауіпсіздік стандарттарына сәйкес келетін заманауи жабдықтармен жабдықталған.
«Халық қатысатын бюджет» жобасы тұрғындардың пікірлерін ескеруге және олардың қажеттіліктеріне қарай қаланың инфрақұрылымын дамытуға мүмкіндік береді. Бұл өзара түсіністік атмосферасын қалыптастырады және азаматтардың қаланың дамуына қатысуын анағұрлым айқын етеді. Көкшетау өз тұрғындарын өмір сапасын жақсартуға бағытталған жаңа өзгерістермен қуантуды жалғастыруда.
Мұндай бастамалардың дамуын жалғастыру маңызды, өйткені жайлы қалалық орта – бұл бақытты балалық шақтың және барлық тұрғындардың қала өміріне белсенді қатысуының кепілі.
