Жақсы ауданының әкімі болып Алмагүл Кадралина сайланды. Сайлау нәтижелері бойынша ол 83% дауыс жинап, өз қызметін сақтап қалды. Айта кету керек, сайлауға халықтың қатысуы 77,8%-ды құрады
Жұмыс сапары аясында аудан активіне сайланған әкімді Ақмола облысының әкімі Марат Ахметжанов таныстырды.
«Халыққа қызмет етудің тұжырымдамалық стратегиясын ұстану қажет. Қазір сіздің алдыңызда азаматтардың әл-ауқатын жақсарту бойынша міндеттер тұр. Тұрғын үй-коммуналдық шаруашылық, құрылыс, өнеркәсіп және ауыл шаруашылығы салаларындағы жұмыстарды жандандыру қажет», – деп атап өтті облыс әкімі.
«Көрсетілген сенім үшін алғысымды білдіремін. Ауданның одан әрі өркендеуі үшін барынша күш салуға тырысамын», – деді Алмагүл Кадралина.
Кадралина Алмагүл Аманжолқызы, 1978 жылы туған, Көкшетау қаласының тумасы. Еңбек жолын 2000 жылы Көкшетау қаласы прокуратурасының маманы болып бастаған.
2004-2012 жылдары Ақмола және Қарағанды облыстары мен Астана қаласы бойынша өңіраралық жер инспекциясында, Ақмола облысы бойынша аумақтық жер инспекциясында жауапты лауазымдарда жұмыс істеді.
2013-2021 жылдары басшының орынбасары, кейін Ақмола облысының жер қатынастары басқармасын басқарды. 2021 жылдың қазан айынан бастап Жақсы ауданының әкімі лауазымын атқарды.
