Ақмола облысының әкімі Марат Ахметжанов Бурабай ауданында жұмыс сапарымен болды.
Сапар Бурабай кентіндегі кәріз тазарту құрылыстарының құрылыс барысымен танысудан басталды. Жоспарланған жобалық қуаты тәулігіне 10 мың м3 құрайды.
Бұл кәсіпорынның құрылысы 2013 жылы басталған, алайда пайдалануға берілмеген. Су бұру желілері мен кәріз сорғы станцияларының құрылысы бойынша жұмыстарды аяқтау қажет, ол арқылы резервуарларды толтыру қамтамасыз етіледі және іске қосу-реттеу жұмыстары жүргізіледі.
Облыс әкімі тазарту құрылыстарын салу – курорттық өңір үшін стратегиялық маңызды жоба екенін атап өтті.
Жылу беру маусымының басталуы туралы мәселе облыс бойынша өзекті болып қала береді.
Сапар Оқжетпес ауылындағы әмбебап блок-модульді қазандыққа барумен жалғасты.
Бурабай ауданы әкімінің орынбасары Ерлан Бидановтың айтуынша, қазандықтың қуаты 14 МВт құрайды. Бүгінгі таңда монтаждау жұмыстары аяқталды, түтін құбырын орнату, жылу желілері мен электр қуатын жеткізу жоспарлануда. Қазандықты пайдалануға беру қолданыстағы жылу желілерінің жүктемесін жеңілдетуге және ауыл тұрғындарын жылумен үздіксіз қамтамасыз етуге мүмкіндік береді. Нысан ағымдағы жылдың қараша айында іске қосылады деп жоспарлануда.
Щучинск қаласында облыс әкімі 4 мыңнан астам тұтынушыны жылумен қамтамасыз ететін № 1 қазандықтың жұмысымен танысты. Белгіленген қуаты – 55,1 МВт. Бүгінгі таңда қазандық іске қосылды, штаттық режимде жұмыс істейді.
Өңір басшысы сондай-ақ «Kaz Beef Processing» ЖШС-де болып, өндірістік үй-жайларды аралап, кәсіпорын өнімдерінің ұсынылған үлгілерімен танысты.
Директор Азамат Орынбаевтың айтуынша, кәсіпорын ірі қара мал етінен өнім өндіруге маманданған.
«Мал сою цехының жобалық қуаттылығы ауысымына 13 тоннаға дейін. Өнімдер салқындатылған және мұздатылған, сондай-ақ вакуумдық қаптаманы қолдана отырып сатылады. Ет өнімдері Астана, Алматы, Петропавл, Павлодар қалаларына, Ресей Федерациясының қалаларына экспортталады», – деді кәсіпорын директоры.
Өндірісте инновациялық технологиялар кеңінен қолданылады. Әрбір жануар анықталған. Арнайы деректер базасында ІҚМ туралы барлық ақпарат сақталады.
Марат Ахметжанов мал шаруашылығында цифрландыру оң қарқын алып келе жатқанын атап өтті.
«Қазіргі әлем үнемі өзгеріп отырады, дамып, жетілдіріліп отырады. Барлық мал төлқұжатталуы керек, соның арқасында адам жануар туралы толық ақпарат ала алады», – деп атап өтті облыс әкімі.
Соңында «Азия Котломаш» ЖШС-не барды. Негізгі қызмет түрі – бу және су жылу қазандықтарын жасау. Жобалық қуаттылығы жылына шамамен 154 дана бу және су жылу қазандықтарын өндіру.
Өңір басшысы осы саланы дамытудың перспективалылығын ерекше атап өтіп, отандық компаниялардың дамуына жан-жақты қолдау көрсетуге шақырды.
