Ассамблея реформаларды қоғамдық тұрғыда қолдауды кеңейтуге ықпал етті. Бұл туралы бүгін елордада Қазақстан халқы Ассамблеясының сессиясында Мемлекет басшысы Қасым-Жомарт Тоқаев айтты, деп хабарлайды ҚазАқпарат тілшісі.
Президенттің айтуынша, еліміздегі ауқымды түрлендіру барысында Ассамблеяға ерекше көңіл бөлінді. Бұл бірегей институт халықаралық озық тәжірибеге толығымен сәйкес келетін парламенттік өкілдіктің жаңа тетіктеріне ие болды.
Сонымен қатар Қасым-Жомарт Тоқаев Ассамблеяның ұсынысы бойынша Президент тағайындайтын Сенаттың бес депутаты заңнамалық деңгейде кері байланысты, қоғамдық бақылауды қамтамасыз етуге және Парламентте Қазақстанның барлық этностарының мүдделерін білдіруге жұмылдырылғанын айтты.
Мұнымен қоса, Ассамблеяның 12 мүшесі Ұлттық Құрылтай құрамына еніп, оның жұмысына жалпыұлттық диалогтың әмбебап үлгісін ілгерілетуде баға жетпес тәжірибе әкелді.
Мемлекет басшысының сөзіне қарағанда, Ассамблея еліміздің саяси жаңғыруында, жалпыұлттық бірлікті нығайтуда маңызды рөл атқарды. Ассамблея реформаларды қоғамдық тұрғыда қолдауды кеңейтуге, мемлекет дамуының стратегиялық міндеттерін шешуге барлық этностарды тартуға ықпал етті.
Бұдан бұрын хабарланғандай, Президент Қасым-Жомарт Тоқаевтың қатысуымен Қазақстан халқы Ассамблеясының ХХХІІ сессиясы басталды.
ХХХІІ сессияның тақырыбы – «Әділетті Қазақстан: бірлік, тұрақтылық, даму».
