2025 жылға дейін мемлекеттік қызметтер 100% eGov Mobile қосымшасы арқылы қолжетімді болады. Ол туралы бүгінгі брифингте «Азаматтарға арналған үкімет» мемлекеттік корпорациясы Ақмола облысы бойынша филиалының директоры Жасқайрат Еслямбеков мәлімдеді. Спикердің айтуынша, қазіргі таңда азаматтар eGov.kz электрондық үкімет порталында мемлекеттік қызметтердің 95%-ын ала алады.
«eGov Mobile қосымшасына келер болсақ, мұнда мемлекеттік қызметтің 678 түрі шоғырланған. Жыл соңына дейін қосымшадағы мемлекеттік қызметтер спектрін 80%-ға дейін ұлғайту көзделіп отыр» – дейді филиал директоры.
Айта кетейік, жыл басынан бері аталмыш мобильдік қосымша 11 миллионнан астам мемлекеттік қызмет көрсету операциясын іске асырып үлгерді. Бұл қосымша Халыққа қызмет көрсету орталығына бармай-ақ кәдімгі смартфонның көмегімен әлемнің кез келген түкпірінен мемлекеттік қызмет алуға мүмкіндік береді.
Дереккөз: https://t.me/resmi03
Фото: kp.ru
