Демек, болашақта төрт түлікпен бірге киіктерді де асырау жоспарланып отыр. Ал, мамандар етін консервілеп, нарыққа шығарсақ, әлемнің ең озық мейрамханалары біздің бұл өнімге жаппай тапсырыс береді деген сенімде екен.
Ол үшін еліміз бойынша 1 800 бас киік арнайы орындарда ұсталады. Экологтардың пікірінше, бұл бір жағынан ақбөкендер жиі ауыратын жұқпалы пастереллез ауруынының себебін анықтап, алдын алуға мүмкіндік береді. Алайда, елімізге танымал зоологтар, Экология министрлігінің шенеуніктері көтерген бұл бастамамен келіспейді. Айтуларынша, киікті қолға үйрету мүмкін емес. Себебі, түз жануары кең атырапты жерлерде еркін жүруге машықтанған. Ал, шектелген аймақта өмір сүру олардың қырылуына әкеп соғуы ықтимал.
Әзірге киіктерді нақты ату-атпау туралы шешім шыққан жоқ. Қазір елімізде шамамен, 1,5 миллиондай киік бар. Ақмола облысында да киіктерге байланысты ғылыми жобаға 500-дің төңірегінде киік қарастырылған. Бірнеше жыл бұрын қырылуға шақ қалған жануарлардың популяциясы қазір қалпына келгені белгілі. Алдағы уақытта киіктер ғылыми зерттеу жүргізу үшін ғана аулануы мүмкін деген болжамдар айтылуда. Былтыр киіктің көбейіп кетуіне қатысты Ақмола мен Батыс Қазақстан облыстарындағы шаруалар шу шығарған. Ақбөкендер егіс алқабын таптап, талай шаруаны шығынға батырған еді.
«Бетпақ дала киіктерінің популяциясы естеріңізде шығар. Онда пастереллезден 90 пайызы қырылып қалған еді. Осындай жағдайлардан киіктерді сақтап қалу керек. Егер пастереллез індетінен жаппай қырылатын болса, біздің питомниктерде өсіп жатқан киіктер жаппай вакцина алған және аурулардың барлығына төтеп бере алатындай иммунитеті мықты жағдайда болады», – дейді бұл ретте, Экология және табиғи ресурстар министрлігі Комитетінің бас сарапшысы Асқар Әбдірахманов.
Айта кетейік, бұған дейін Экология, геология және табиғи ресурстар министрлігі елде 1815 бас киік ату жоспарланып отырғанын мәлімдеген болатын. Тиісті заң жобасы «Ашық НҚА» сайтында жарияланған және ол 7 ақпанға дейін қоғам талқысында болады.
«Арқа ажарының» ақпараты
