Ақмолалық құтқарушылар жылқыларын іздеуге шығып, жоғалып кеткен 43 жастағы ер адамды екі күн бойы іздестірді, – деп хабарлайды Ақмола облысы Төтенше жағдайлар департаментінің баспасөз қызметі.
Жоғалған ер адамды іздеуге Төтенше жағдайлар департаментінен 25 адам мен бір бірлік техника, аудандық полиция бөлімінен 10 адам және үш бірлік техника, Lider.kz тобының жеті еріктілері мен екі бірлік техника, «Айғабақ» ЖШС екі қызметкері мен бір бірлік техника мен Алқатерек ауылының бір жергілікті тұрғыны жұмылдырылған. Сағат 22-20-да іздестіру тобы ер адамды Солтүстік Қазақстан облысының Алқатерек ауылынан 25 шақырым жерден тапты. Ер адам медициналық көмекті қажет етпеген.
Естеріңізге сала кетейік, 2023 жылдың 11 қаңтарында сағат 13:00 шамасында 1980 ж.т. ер азамат Бурабай ауданы Наурызбай батыр ауылынан Солтүстік Қазақстан облысы Алқатерек ауылына қарай жылқы іздеп шығып, хабар-ошарсыз кеткен. Іздестіру жұмыстары ауа райы жағдайларына – қарлы боран, кей жерлерде көру мүмкіндігі шектеулі болғандығына байланысты қиындай түскен болатын.
Ақмола облысының ТЖД осындай төтенше жағдайлар туындаған жағдайда «112» нөміріне қоңырау шалып, туыстарыңызға және жақындарыңызға геолокацияңызды айтып отыру қажеттігін еске салады. Өзіңізге және жақындарыңызға қамқор болыңыз!
Ақмола облысы ТЖД баспасөз қызметі
