Облыс орталығы маңындағы Красный Яр кентінде Ақмола облысының жастар ресурстық орталығы ұйымдастырған «табиғатта қоқысқа орын жоқ» экологиялық акциясы өтті.
Қылшақты өзенінің жағалауы тұрмыстық қалдық: бөтелкелер, майлықтар, бір реттік ыдыстар және басқа да қоқыс атаулымен әбден ластанған екен. Акцияға Красный Яр ауылындағы емхана ұжымы да қатысты. Жастармен бірлесіп, медицина қызметкерлері барлық қоқыстарды жылдам жинап, оларды әртүрлі қоқыс дорбаларына сұрыптады. Белсенділер қауымы өңір тазалығы үшін жасалып жатқан игі жұмысты абыроймен аяқтауға тырысты. Тіпті көзге көрінбейтін ұсақ қоқыстардың да көзін жойып, өзен айналасын жайнатты.
Эко-акцияны ұйымдастырушы, облыстың жастар ресурстық орталығының басшысы Мансия Есекееваның айтуынша, бүгінгі таңда эко мәдениет халық арасында айтарлықтай өсуде, қоғам саналы түрде табиғат тазалығына алаңдап, әрекет қылатын болған.
«Бүгін Красный Яр ауылының медицина қызметкерлерімен бірге біз акцияға шығып, барлық қоқыстарды жинадық. Акция бүкіл өңір аумағында жалғасын табады. Бұл істе аудандардағы әріптестеріміз де үлес қосады. Біздің еріктілер тобы экология Департаментімен тығыз жұмыс істейді. Бүгін ауа-райы да тамаша, және осылай қыс түскенше, біз күн сайын қала мен ормандарды қыс мезгіліне дайындаймыз. Экологиялық іс-шаралардың санын көбейту жоспарда бар: бұл ағаш отырғызу, орман алқабы мен қала көшелерін қоқыстардан тазарту сынды жұмыстыр. Жақында біз Көкшетау жағалауының аумағын тазарттық, қоғамның эко-мәдениеті артып, табиғат пен туған қалаға ұқыпты қарайтын жауапты адамдар көбейіп келеді. Біз барлық қазақстандықтарды туған жеріне бей – жай қарамауға және оны ластанудан қорғауға шақырамыз», – дейді Мансия Мұхтарқызы.
Сенбілікті ұйымдастырушылардың бірі, қаланың таза болуы әр тұрғынның санасына байланысты деп есептейді.
«Мұндай іс-шараларды жиі өткіземіз. Біз өзіміз табиғат үшін алаңдаймыз, туған қала тазалығына бей-жай қарай алмаймыз. Облыс бойынша 20 Жастар орталығы мен 80 адамнан тұратын еріктілер тобы жұмыс істейді. Қыста біз көшелерді қардан тазартамыз. «Таза Әлем» жобасы рейтингінің қорытындысы бойынша Ақмола облысы тазалық деңгейі бойынша бірінші орында. Мен «Эко жас» жобасын өткізіп, оқушылармен жұмыс істедім, бізде оқушылар ересектерге қарағанда ақылды әрі саналы. Өкініштісі, сейілден кейін қарапайым өзінің отырған жерін тазалауды білмейтін ересектер де бар», – дейді Ақмола облысының еріктілерді қолдау орталығы фронт-офисінің басшысы Дастан Ермеков.
Өлке табиғатының тазалығына бей-жай қарамайтын белсенділердің көп болғаны жанды жадыратады. Мысалы, пациенттерді қолдау қызметінің медбикесі Анар Құлтасова қоршаған орта тазалығын үнемі қадағалап отыру қажет, деп санайды.
«Красный Яр кентінің емханасының ұжымы болып жағалау аумағын тұрмыстық қоқыстардан тазартуға шықтық. Бұл жер ауыл тұрғындарының сүйікті демалыс және балық аулау орындарының бірі. Біз табиғатымыздың қоқысқа толып, демалушылардың денсаулығына кері әсерін тигізгенін қаламаймыз», – дейді табиғат жанашыры.
Айта кету керек, өңірде эко еріктілер саны көбейіп келеді, табиғатқа бей-жай қарамайтын адамдар қыс мезгілінде де қызметті тоқтатпауды жоспарлап отыр.
Камила Әбделманова
ФОТО: Женис Балабеков
