Елбасы сайтының хабарлауынша, кездесу барысында Мария Әуезова Нұрсұлтан Назарбаевқа өзінің асқақ арманын жүзеге асыруға – бионикалық протез салдыруда көрсеткен қамқорлығы мен қолдауы үшін алғыс білдірді.

Қазақстанның тұңғыш президенті мүмкіндігі шектеулі болғанына қарамастан, Эвересті бағындыруға бел буған спортшының табандылығын атап өтті.

«Бір кезде мен Абай шыңын бағындырдым. Мұның қандай қиын екенін білемін. Сіз Эверестке көтерілу арқылы табандылық таныттыңыз. Жарайсыз! Сіз секілді адамдар рухтандырады әрі жігерлендіреді, – деді Нұрсұлтан Назарбаев.

Айта кетері, 2021 жылдың сәуірінде альпинистер тобы Мария Әуезовамен бірге Эверест базалық лагеріне (5364 метр) және Кала-Патхар тауына (5640 метр) көтерілді. Аяғы болмаса да Эвересті бағындырған альпинистің әрекетіне таң қалған Елбасы ҚХА-ның 29-сессиясы барысында қызға протездер орнатуға көмектесуге уәде берді.

Нұрсұлтан Назарбаев қоры қолдауымен Әуезоваға бионикалық протездер орнатылып, мамандардың бақылауында бейімделу курсынан өтті.