Қасым-Жомарт Тоқаевтың төрағалығымен Жоғары Еуразиялық экономикалық кеңестің отырысы өтеді, деп хабарлайды sputnik.kz.
Қазақстан президенті Қасым-Жомарт Тоқаев Жоғары Еуразиялық экономикалық кеңестің отырысына қатысады. Бұл туралы мемлекет басшысының баспасөз хатшысы Берік Уәли Facebook-те хабарлады.
Іс-шара бүгін, 10 желтоқсанда бейнебайланыс форматында өтеді. Жиынға Кеңеске мүше мемлекеттердің және бақылаушы елдер – Куба, Молдова, Өзбекстанның басшылары қатысады деп жоспарланған.
Мемлекеттер басшылары Еуразиялық экономикалық одақ қызметіне қатысты өзекті мәселелерді, 2021 жылғы ынтымақтастықтың нәтижелерін, сондай-ақ алдағы уақытта Ұйымға мүше мемлекеттердің өзара экономикалық іс-қимылдарды дамыту жоспарын талқылайды.
Қазақстанның ұйымға төрағалығы осы жиынмен аяқталады.
Отырыс Нұр-Сұлтан қаласының уақытымен сағат 15.00-де «Хабар-24» телеарнасынан тікелей эфирде көрсетіледі.
