Қазақстан Республикасы Тәуелсіздігінің 30 жылдығы және Қазақстан Республикасы судьялар одағының 25 жылдығы құрметіне Көкшетауда дойбы, шахмат, үстел теннисі және мини футболдан турнир өткізілді, деп хабарлайды «Aqmola News» Ақмола облыстық сотының баспасөз қызметіне сілтеме жасап.
Ақмола облыстық сотының қызметкерлері мен судьялар арасындағы жарысты облыстық сот пен судьялар одағының филиалы ұйымдастырды. Турнирдің ашылу салтанатында Ақмола облыстық сотының қылмыстық істер жөніндегі сот алқасының төрағасы Раджаб Даминов пен судьялар одағы филиалының төрағасы Бейбіт Нұржан құттықтау сөз сөйледі.
Раджаб Даминов Ақмола облысының соттарында Қазақстан Республикасы Тәуелсіздігінің 30 жылдығы құрметіне бірнеше ісшаралар басталғанын атап өтті. Жарыс қатысушыларына екпе алып, маскалық режимді сақтау және спорттық формада болу басты талап болды.
«Спартакиада дене шынықтыру және спортты салауатты өмір салтын қалыптастыру судьялар мен мамандар арасында маңызды фактор ретінде насихаттау, бұқаралық спортқа тарту, ұжымда корпоративтік рух пен ұжымның ұйымшылдығын дамыту мақсатында өткізілді», – дейді облыстық соттың қылмыстық істер жөніндегі сот алқасының төрағасы Раджаб Даминов.
Ақмола облыстық сотының, Көкшетау қалалық сотының, мамандандырылған соттар мен аудандық соттар құрама командалары спорттың төрт түрі бойынша бақ сынасты.
Спартакиаданың жеңімпаздары мен белсенді қатысушылары кубоктармен, дипломдармен және бағалы сыйлықтармен марапатталды.
