Степногорск қаласында белгісіз біреулер тұрғын үйдің гаражынан 18 қап картопты ұрлап кеткен, деп хабарлайды «Aqmola News».
Бұл туралы Ақмола облысы полиция департаментінің баспасөз қызметінен хабарлады. Степногорск қаласының полиция басқармасына жүгінген 30 жастағы жергілікті әйел анасының гаражынан жаңа шыққан 18 қап картопты жымқырып кеткенін мәлімдеген. Жедел іздестіру шаралары барысында тергеу тобы күдікті адамды анықтады. Ол осыған дейін де ұрлық үшін қылмыстық жауапкершілікке тартылған жәбірленушінің 35 жастағы ағасы болып шықты.
«Ер адам ұрлап кеткен картопты таксимен шығарып жергілікті кәсіпкерлердің бірімен оны сатуға келісіп қойғаны анықталды. Аталған факті бойынша қылмыстық кодекстің «Ұрлық» бабымен сотқа дейінгі тергеу амалдары басталды», – деді Ақмола облысының полиция департаментінен.
