Ақмола облысының қылмыстық істер жөніндегі мамандандырылған ауданаралық соты Бурабай ауданының төрт тұрғынын өлтірген сотталушыны өмір бойына бас бостандығынан айыруға үкім шығарды.
Сотта анықталғандай, сотталушы ішімдік ішкеннен кейін зардап шеккендердің бірімен болған жанжалдың салдарынан ұйықтап жатқанда төрт әйелді, яғни дәрменсіз күйде болған адамдарды өлтірген. Сотталушының кінәсінің дәлелі оның кісі өлтіргені туралы адвокаттың қатысуымен берілген алғашқы мойындауы болды.
Сонымен қатар, табылған қылмыс құралы пышақтан ер адамның жеке иісі мен жәбірленушілердің қаны табылды. Сотта прокурор мен жәбірленуші тарап өмір бойына бас бостандығынан айыруды сұрады. Алайда сотталушының өзі айғақтарын өзгертті, кінәсін мойындамады және жасаған ісіне өкінбеді.
«Сот сотталушыға өмір бойына соттау кезінде сотталушының бұрын бірнеше рет сотталғанын, бұрын тағайындалған жазалар оны түзету үшін жеткіліксіз екенін және ол өзіне тиісті қорытынды жасамай, ұйықтап жатқан төрт жазықсыз әйелді өлтіргенін ескерді. Сондай-ақ, сот аса ауыр қылмыстың мән-жайын, қоғамдық қауіптің сипаты мен дәрежесін, қаза тапқандардың санын ескерді. Сонымен бірге қылмыстың себебі жәбірленушімен шамалы қақтығыс, жәбірленушілердің дәрменсіз жағдайын пайдалану болды. Сот аталған мән-жайды ескере отырып, сотталған адамды қоғам үшін аса қауіпті деп санады. Сотталған адамның кінәсін жеңілдететін жағдай кәмелетке толмаған баланың болуы болды. Сот сотталған адамның жауапкершілігін ауырлататын мән-жай деп қылмыс жасауды алкогольдік масаң күйде деп таныды», – деп атап өтті ведомстводан.
Сол себепті сот ер адамға өмір бойына бас бостандығынан айыру жазасын тағайындады. Ол оны төтенше қауіпсіздік қылмыстық-атқару жүйесі мекемесінде өтейтін болады. Осы ретте ол алғашқы үш жылын толық қауіпсіз қылмыстық-атқару жүйесі мекемесінде өткізеді. Сот жәбірленушінің моральдық зиянды өтеу туралы мәлімделген талап-арыздарын толық көлемде қанағаттандырды. Сот үкімі заңды күшіне енген жоқ.
Еске сала кетейік, өткен жылдың 5 желтоқсанында Бурабай аудандық полиция бөлімінің кезекші бөліміне Бурабай кентінің тұрғыны хабарласып, көпқабатты тұрғын үйдің пәтерінде төрт әйелді өлтіргенін айтқан болатын. Кейін полиция қызметкерлері бірнеше рет сотталған 28 жастағы жергілікті тұрғынды ұстады.
