Ел Тәуелсіздігінің 30 жылдығы мен Спорт күнін мерекелеу аясында Есіл ауданында түрлі жарыстарда аудан, облыс, республика намысын қорғайтын жаттықтырушылар құрамы мен спортшылардың қатысуымен «Дені сау ұрпақ – ұлт құндылығы» атты дөңгелек үстел өтті, деп хабарлайды «Aqmola News» облыстық ішкі саясат басқармасына сілтеме жасап.
Шараға аудан әкімінің орынбасары Нұрлан Саматов қатысып, спортшыларды кәсіби мерекелерімен құттықтады.
«Ауданда бұқаралық спортты дамытуға ерекше көңіл бөлінген. Дене шынықтырумен және спортпен айналысу үшін барлық қажетті жағдайлар жасалады, бұл халықтың денсаулығын нығайтуға және салауатты өмір салтын насихаттауға ықпал етеді. Біздің спортшылар үлкен спорт ареналарында ауданымыздың абыройын асқақтатуда. Біз спортшыларымыздың жетістіктерін мақтан тұтамыз, спорт шеберлерінің қолынан эстафетаны қабылдап жүрген жастардың жетістіктеріне қуанамыз. Сіздерге жаңа спорттық жетістіктер мен жеңістер тілеймін», – деді Нұрлан Саматов құттықтау сөзінде.
Кездесу барысында жиналғандар ауданның спорт саласының ағымдағы жағдайын талқылады, сондай-ақ дене шынықтыру мен спортты одан әрі дамыту мәселелері бойынша пікір алмасты. Шара соңында аудан әкімінің орынбасары жаттықтырушылар мен спортшыларға алғыс хаттар табыс етті.
Марапатталғандардың арасында Есіл балалар-жасөспірімдер спорт мектебінің түлегі Бекзат Баймұратов бар. Жас жігіттің әртүрлі спорт түрлері бойынша көптеген жетістіктері бар.
Бекзат жауынгерлік самбодан және грэпплингтен ҚР спорт шебері, қоян-қолтық күрестен және еркін күрестен спорт шеберіне үміткер. Грэпплинг бойынша Қазақстан чемпионы және «Asia open» халықаралық турнирінің күміс жүлдегері, қоян-қолтық ұрыс бойынша республикалық турнирлердің чемпионы, жауынгерлік самбодан Қазақстан чемпионатының жүлдегері, сонымен бірге, осы жылғы грэпплингтен Қазақстан чемпионы атағына ие болды.
Аудандық балалар мен жасөспірімдер спорт мектебінің тәрбиеленушісі болған тағы бір талантты спортшы Ілияс Сайфулин. Ол жақында Болгарияда өткен ММА бойынша жасөспірімдер арасындағы әлем чемпионатында қола медаль жеңіп алды.
Ақмола облысының аудандары мен қалаларында балалар мен жасөспірімдерді дене шынықтырумен айналысуға тартуға үлкен көңіл бөлініп келеді. Бүгінгі таңда 29 спорт мектебінде 15 мыңнан астам жас атлет жаттығады.
