Аймақта сұраныс артқанмен алдағы уақытта ет тапшылығы болмайды. Облыс бойынша соңғы жеті айдағы көрсеткіштерге қарағанда, 109,1 мың тонна мал еті мен құс еті өндірілген,-деп хабарлайды «Aqmola News» ақпарат агенттігі.
Майра ҚУАНЫШҚЫЗЫ
Бұл туралы өңірлік коммуникациялар қызметі алаңында «Ет өндірісін кеңейту мәселелері» тақырыбындағы брифингте ауыл шаруашылығы басқармасы басшысының орынбасары Мұрат Ырғыбаев айтты.
Оның айтуынша, Ақмола облысы ет өндірісі бойынша көш бастап тұр. Ет өндірісімен айналысып жатқан кәсіпорындар тек облыстағы сұранысты толығымен қамтамасыз етіп қана қоймай, Нұр-Сұлтан қаласының етке деген сұранысының 30 пайызын қамтып отыр.
Мұндай нәтижеге аймақтағы ірі ет өндіру орындары арқылы қол жетіп отыр.
Мәселен, «Макинск құс фабрикасы» жылына 60 тонна құс етін өндірсе, Зерендідегі «Блиц Терминал» жауапкершілігі шектеулі серіктестігі 2,5 тонна, Көкшетау қаласындағы «Биборд» серіктестігі 5,0 мың бас бордақыланған мал басын даярлап отыр.
Спикердің айтуынша, дегенмен ет бағасының өсу қаупі де жоқ емес.
Егер қарапайым тілмен айтсақ, еліміздегі сарапшылар мен зерттеу институттарының пайымдауынша, ет бағасы өсуі мүмкін. Мұның басты себебі – қуаңшылық. Жем-шөп азайса, ет өндірісіне де әсер етеді,-дейді спикер.
Ал, ет өндірісін ары қарай да дамыту мәселесіне келсек, ауылшаруашылығы басқармасы 2021 жылға арнап жол картасын әзірлеген. Осы құжатқа сәйкес, жыл аяғына дейін 112 ферма құрылуға тиіс. Мұнда 5,9 мың ірі қара мал басы өсіріледі деп жоспарлануда.
Әзірге барлығы 35 ферма іске қосылған. Онда барлығы 2170 бас асыл тұқымды ірі қара мал өсірірілуде.
Мал азығын дайындау бойынша да тиісті шаруалар атқарылуда. Облыс әкімі мал азығына қатысты туындаған мәселелерді шешу мақсатында іс-шаралар жоспарын бекітіп,басқармаға тиісті міндеттерді жүктеді. Күндеделікті аудан басшылары мен ауылшаруашылығы мамандарымен жедел штаб отырыстары өтеді. Әзірге жем-шөпке қатысты мәселе туындаған жоқ. Барлығы жоспарға сәйкес орындалуда,-деді Ырғыбаев.
