Ақмола полициясы Көкшетау тұрғынын жауапкершілікке тартты. Ер адам көлікті жөндеп жатқанда жасөспірім баласы әкесінің уақытша шығып кеткенін пайдаланып, рульге отырып, біреудің қоршауына кіріп кеткен, деп хабарлайды «Aqmola News» АА аймақтың ПД баспасөз қызметіне сілтеме жасап.
17 мамыр күні сағат 22.00 шамасында 8 март көшесіндегі аулалардың бірінде 50 жастағы ер адам «Mitsubishi Pajero»маркалы автокөлікті жөндеу жұмыстарын жүргізген.
«Осы сәтте оның 12 жасар ұлы автокөлік салонына отырып, көлікті оталдырған. Автокөлік алға шығып, металл қоршауға соғылған», – деп хабарлады Ақмола облысы ПД баспасөз қызметі.
Содан кейін иесі көлікті оқиға орнынан алып, ішкі істер органдарына хабарламай кетіп қалған.
Алайда, куәгерлер оқиғаны телефон камерасына жазып, әлеуметтік желілерге орналастырды. Нәтижесінде бір сағаттан кейін полицейлер жүргізушіні анықтап, осы факті бойынша жауапқа тартты.
«Автокөлік иесіне ҚР ӘҚБтК – нің 611-бабының 1-бөлігі бойынша әкімшілік хаттама толтырылды», – деп нақтылады баспасөз қызметінен.
Полицейлер белсенді азаматтық ұстанымы үшін бей-жай қарамайтын азаматтарға тағы да алғыс білдіреді.
