Рамазан айының қарсаңында, ҚМДБ-ның «ЕЛ ҮЛЕСІ ПӘТЕРГЕ» республикалық қайырымдылық акциясы аясында ерейментаулық жалғыз басты ана Айсұлу Алгазиноваға екі бөлмелі пәтердің кілті табысталды,-деп хабарлайды «Aqmola News» ақпарат агенттігі.
Нұр-Сұлтан қаласы «Gentlemen’s Club» клубының өкілдері Руслан Шамкенов және Бауыржан Касымбергебаев бұл игі істің бастамашылары болып, жалғыз басты анаға клуб атынан құны 2 100 000 теңге болатын пәтер кілтін табыстады.
Бүгін менің қуанышымда шек жоқ. Баспаналы болғанымызға балалар қуанып жатыр. Төрт балапанымды өзім асырап, жеткізіп келемін. Үйсіз-күйсіз жүргеніміз әрине, жанымызға батып еді. Маған қол ұшын созып жатқан «Ел үлесі- пәтерге» жобасын ұйымдастырушыларға, Руслан Шамкенов және Бауыржан Касымбергебаев азаматтарға, мешіт ұжымына үлкен алғыс айтамын. Жасаған жақсылықтарыңыз еселеп қайтсын,-дейді Айсұлу Алгазинова.
Пәтер кілтін салтанатты табыстау кезінде Ерейментау ауданының әкімі Абай Әлжанов пен «Тоқан Хазрет» мешітінің бас имамы Еркебұлан Исенов барлық клуб мүшелеріне алғыс білдіріп, кәсіптеріне береке-табыс тіледі.
Еске сала кетсек, жалпы акция аясында республика бойынша 366 пәтер кілті табысталды.
Бұл Ақмола облысы бойынша табысталған 16- шы пәтер кілті болды.
