Көкшетаудағы ірі сауда орталықтарының бірі «Арбат» нысанында бомба қойылғаны туралы телефон хабарламасы түсті, – деп хабарлайды «Aqmola News».
Полицияға телефон шалған адам нысанның миналанғанын хабарлаған. Бұл туралы Ақмола облысы полиция департаменті мәлім етті.
«Бүгін кешкі сағат 20:33-те полиция департаментінің кезекші бөліміне төтенше жағдайлар департаментінен хабарласып, белгісіз біреудің «Арбат» сауда үйіне мина қойылғанын хабарлағанын айтты. Дереу оқиға орнына жедел-тергеу тобы атанды. Бірнеше автопатрульді көліктер мен жаяу жасақ барды. Шамамен жүзден астам адам эвакуацияланды. Қазіргі уақытта полиция қызметкерлері ғимаратты тексеріп, жарылыс техникалары жұмыс істеуде», – деп мәлімдеді Ақмола облысы полиция департаментінің баспасөз қызметінің жетекшісі Гүлнәр Пинчук.
Қазір телефон шалған адамның кім екені анықталып жатыр. Абырой болғанда тексеріс барысында ешқандай қауіп болмаған.
