Ақмола облысында 181 мобильді мониторинг тобы жұмыс істейді. Соңғы бір екі күнде жоспарсыз жүргізілген рейдтер нәтижесінде 90 нысанға тексеріс жүргізіп, 6 қоғамдық тамақтану мен демалыс орталықтарында карантин талаптарын бұзу фактілері тіркелген,-деп хабарлайды «Aqmola News».
Майра ҚУАНЫШҚЫЗЫ
Бұл туралы Өңірлік коммуникациялар қызметі алаңында өткен брифингте Көкшетау қаласының бас санитар дәрігері Қанат Искаков жеткізді.
Спикердің таратқан мәліметінше, мобильді топ 20 шақты азық-түлік дүкендеріндегі маскалық режімді бұзу дерегін анықтап, әкімшілік жауапкершлік жүктеген.
Сонымен қатар қаладағы «Апшерон», «Антилопа», «Ани» сияқты қоғамдық тамақтану орындарында уақыт шектеуіне қарамастан, қорқор тартылып, еске алу кештері өткізілген.
Бұдан бөлек карантин талаптарын бұзу дерегі 1 компьютер клубында, 1 қоғамдық моншада және 1 демалыс орталығында тіркелген.
Карантин шектеулерін ескермей жұмыс істеген мекемелерге жалпы көлемі 6 миллион теңгеден астам айыппұл салынған.
Айта кетерлігі, өңірде соңғы тәулікте коронавирус жұқтырудың 129 жағдайы зертханада расталды. Өңірде 11 мектеп 14 күнге карантинге жабылды.
