«Nur Otan» партиясының атынан аудандық мәслихат депутаттығына үміткер Дамир Шоқанұлы Сұрағанов Атамекен ауылдық округінің ғимаратында жергілікті тұрғындармен кездесіп, сайлауалды бағдарламасымен таныстырды.
Сеніммен батыл қадамдарға барып, нақты істі халыққа керекті жобаны жүйелі түрде жүзеге асырып жатқан «Nur Otan» партиясының еліміз бойынша атқарып жатқан жұмыстары жеткілікті. Өзім педагог маман болғандықтан, ауданымыздың әрбір білімге құштар оқушысының сапалы білім алып, заманына сай тұлға болып қалыптасуы – бәріміздің яғни аға буынның басты парызы. Бурабай төңірегі аңыз бен ақиқатқа толы екендігін барлығымыз да жақсы білеміз. Еліміздің көшбасшысы – Елбасымыз Н.Ә.Назарбаевтың бастамасымен «Рухани жаңғыру» бағдарламасы аясында қыруар жұмыс атқарылды. Тәуелсіздік алғалы құдайға шүкір, экономикалық тұрғыдан табандылық танытып, жеткен жетістігіміз, алған асуымыз, шыққан биігіміз жетерлік. Оның барлығын санап, тізбектеп, тізе бермейік, елге, халыққа, жалпыға жақсы мәлім.
Атамекен ауылы ұлт пен ұлыстың басы қосылған, дастархандас, дәмдес, тұздас болып, айрандай ұйыған ел. Бұл ауылдан да талай мықтылар қанат қағып, білім алып, жоғары қызметте түрлі салада мамандығы бойынша ел игілігі үшін жұмыс атқарып жүр. Біздің аудан туризмдік орталық болғандықтан партияның басты бағыты «Ауданымызға инвестицияларды тиімді салу, мемлекеттік қолдау шараларын барынша нәтижелі қылу, заманауи технологияларды енгізу, өнімділігі жоғары техникамен жабдықтап жарақтандыру, өндірістің жаңа түрлері арқылы даму». Бұл біздің нақты қадамға барып, батыл шешім шығара білетін «Nur Otan» партиясының назарында екендігін айтқым келеді,-деді өз сөзінде Дамир Шоқанұлы.
Жиын барысында депутаттықтан үміткерге сұрақтар қойылып, тұщымды, мағыналы жауаптар қайтарылды.
Елдің бір қалыпты дамуына себепкер болып, қиындықтардан алып шығуына ат салысып келе жатқан «Nur Otan» партиясына сенім білдіретіндіктерін айтып, жиналғандар алдағы сайлауда белсенділік танытамыз деп сендірді.
Аудандық мәслихат депутаттығына үміткер Дамир Шоқанұлы бай тарихы мен мәдениеті бар аймақ болып табылатын ауданымыз бұдан әрі жетістіктерге жетіп, Елбасының партиясымен бірге мәңгілік елге айналатындығын айтып, жиналғандарды «Nur Otan» партиясына дауыс беруге шақырды.
«Nur Otan» партиясының Ақмола облысы Бурабай ауданының Сайлау қорының қаражатынан төленді.
