Ақмола облысының Бурабай ауданында ағаш өңдейтін цех өртенді. Өрттің шығу себептері анықталып жатыр, – деп хабарлайды «Aqmola News» Ақмола облысының төтенше жағдайлар департаментінің баспасөз қызметіне сілтеме жасап.
Щучинск қаласының Верхняя көшесі 22 мекенжайында орналасқан ағаш өңдейтін цехтің отқа оранғаны жайлы хабар Бурабай ауданының өрт сөндіру бөліміне бүгін таңертең 6.45-те түскен.
Оқиға орнына дереу аттанған өрт сөндірушілер тілсіз жаумен екі сағат бойы арпалысқа түскен.
Өртті сөндіруге төтенше жағдайлар бөлімінің 10 қызметкері мен 3 арнайы техника жұмылдырылған. Өрт таңғы сағат 8.00-де ауыздықталып, 08.51-де толықтай сөндірілді. Абырой болғанда өрттен зардап шеккендер болған жоқ, – деді облыстық төтенше жағдайлар департаментінің баспасөз қызметінен.
Қазіргі уақытта өрттің шығу себептері анықталып жатыр.
