Аршалы ауданындағы аудандық мемлекеттік архивтер ғимаратына күрделі жөндеу жұмыстары жүргізілді, – деп хабарлайды «Aqmola News» Ақмола облысының мәдениет, архивтер және құжаттамалар басқармасына сілтеме жасап.
Мекеме «Жұмыспен қамту жол картасы» мемлекеттік бағдарламасы шеңберінде жөнделді.
2020-2025 жылдарға арналған «Архив — 2025» жобасын іске асыру жөніндегі іс — шаралардың кешенді жоспарының 49-тармағы шеңберінде ағымдағы жылы Аршалы ауданының мемлекеттік архивінің ғимаратына күрделі жөндеу жүргізілді. 39 млн. теңге сомасындағы қаржы Жұмыспен қамту жол картасы бойынша бөлінді, мердігер «АСТ-билдинг компани г. Нұр-Сұлтан» ЖШС 35822 мың теңге сомасындағы мемлекеттік сатып алулар бойынша конкурста жеңіске жетті. Жөндеу сапалы, ескертусіз жасалды.
Осы жөндеуден үнемделген қаражат есебінен дауыл соққан жел кезінде зардап шеккен Біржан сал ауданының мемлекеттік мұрағатының ғимаратына 1077 мың теңге сомасына ағымдағы жөндеу жүргізілді.
Бүгінгі күні Облыстың мемлекеттік архивтері үшін басты проблема архив қоймаларының жүктелуі болып табылады (12 архивтің 100% жүктелуі бар).
Облыстың архив қызметі жұмысының негізгі бағыттары: архив ісінде және құжат жасауда бірыңғай мемлекеттік саясатты іске асыру, архив қорын жинақтау және оның орталықтандырылған есебін ұйымдастыру, архив қоры құжаттарының сақталуын және кеңінен пайдаланылуын қамтамасыз ету, «Архивтік анықтамаларын, архив құжаттарының көшірмелерін немесе архив үзінділерін беру» мемлекеттік қызметін көрсету, құжаттарды цифрлық форматқа аудару, «электрондық құжаттардың бірыңғай архив» ақпараттық жүйесін толтыру болып табылады.
Ұлттық архив қоры жыл сайын облыстың экономикалық, әлеуметтік және мәдени дамуын сипаттайтын жаңа құжаттармен толықтырылады. Мемлекеттік архивтер жыл сайын әртүрлі тасымалдаушылардағы құжаттаманы сақтаудың 28 мыңға жуық бірлігін мемлекеттік сақтауға қабылдайды, 30 мыңнан астам тақырыптық, әлеуметтік-құқықтық және генеалогиялық сипаттағы сұраныстарды орындайды.
Бүгінде облыстың 21 мемлекеттік архивінде мемлекеттік сақтауда бір жарым миллионға жуық архивтік істер (1 млн.445 мың сақтау бірлігі) бар.). Оның ішінде 21291 сақтау бірлігі (1155055 Парақ) цифрланды, бұл шамамен 1,4% – ды құрайды. Бірінші кезекте аса құнды және талап етілген құжаттар цифрлық форматқа ауыстырылуға жатады.
