Мағжан Жұмабаев атындағы Ақмола облыстық әмбебап ғылыми кітапханасының коворкинг орталығында «Көкшетау қаламгері» сериясымен шыққан 6 жаңа кітаптың тұсауы кесілді,-деп хабарлайды «Aqmola News».
Майра ҚУАНЫШҚЫЗЫ
Бұл кітаптар Ішкі саясат басқармасының тапсырысымен, Ақмола облысының әкімдігінің қолдауымен жарыққа шықты. Алдағы уақытта «Рухани жаңғыру» жобалық кеңсесі ақындардың кітаптарының таратылуына, көзі қарақты оқырманның қолына тиюіне ықпал етпек.
Тұсаукесер рәсімінен соң сөз алған Ақмола облысының әкімінің орынбасары Айна Ермекқызы Мысырәлімова ақындарды құттықтап, шығармашылық табыс тіледі.
Көкше өңірі табиғат сұлулығымен қатар қаламгерлерге де, ақын жырауларға да, небір дарындарға бай өлке. Бұл шығармалар жас ұрпақ тәрбиесіне әсер етіп, Отаншылдыққа бастап, жас өреннің жүрегін қозғары сөзсіз. Тарихымыз бен мәдениетімізге, әдебиетімізге қосар үлес еселене берсін,-деді Айна Ермекқызы.
Жиында Жабал Ерғалиев, Нұртас Ахат, Құдайберлі Мырзабек сынды ел ағалары талантты жастардың өсіп келе жатқандығына ризашылықтарын білдіріп, ақындардарға жылы лебізін арнап, облыс әкіміне алғыстарын жеткізді.
Ұлтымыздың жаңа формациясын қалыптастыруда алдыңғы буын интеллигенцияның рөлі мен міндеті ауыр. Президент өз Жолдауында да зиялы қауымға үміт артты. Кейінгі ұрпаққа қолдау көрсетіп, қазақ халқының ұлттық бояуын сақтап қалуда қаламгер қауымының үлесі айтарлықтай екені даусыз. Бұл кітаптар көкжиегімізді кеңейтіп, рухани мұра ретінде ұлт мүддесіне қызмет ететініне сенімдімін,-деді жазушы, «Арқа ажары» газетінің бас редакторы Жабал Ерғалиев.
Осы кеште Ерболат Баятұлының «Уақыт шеңбері», Қайырбай Төреғожаның «Көкжиек», Ұлмекен Тыныштыққызының «Мен күткен көктем», Абылай Мәуленнің «Лабиринт», Табысбек Үсеннің «Бозжусан» кітаптарымен қоса Алмас Темірбайдың «Жекебатыр» жинағы оқырманға ресми жол тартты.
Кеш соңында көкшелік зиялы қауым бұл тың жобаның жалғасын табуына тілектестік білдіріп, өңірдің жас ақын-жазушыларының шығармалары жарыққа шыға берсін деген телекпен тарқасты.
.
