Мемлекет басшысы Қасым-Жомарт Тоқаев азаматтардың демалыс орындарындағы жағымсыз әрекетіне қатысты пікір білдірді, деп хабарлайды » Aqmola News «.
Бұл туралы Мемлекет басшысы Қасым-Жомарт Тоқаев өзінің твиттердегі парақшасында жазды.
«Азаматтардың табиғи демалыс орындарындағы жаппай мәдениетсіздігі тоқтамай тұр. Отандастарымыздың ерекше қызғылт түсті «Көбейтұз» көліне келтірілген орасан зор зиянға қатысты алаңдаушылығы орынды.
Бұл жағымсыз әрекеттер өскелең ұрпаққа жүргізілетін экологиялық ағарту жұмыстарының түйткілдерін ашып берді. Білім, Экология, Ақпарат министрліктері бұл мәселені жұмыстарының басым бағыты ретінде қарастыруы керек»- делінген хабарламада.
Бұған дейін Көбейтұз аумағына көлікпен кірген азамат ұсталып әкімшілік жауапкершілікке тартылды.
Бұдан бөлек әлеуметтік желі қолданшылары адамдар көлдегі тұзды қап-қабымен әкетіп, коронавирустан қорғайтын «дәрі» ретінде сатып жатқанын жазған болатын.
Көбейтұз және Қоржынкөл көлдерін жекеменшік секторға 49 жылға жалға берілетіндігі айтылған еді.
