Қайғылы оқиға 8 шілде күні кешкі сағат жетілер шамасында болған. Бұланды ауданының орталығы Макинск қаласының шетінде орналасқан жасанды су қоймасына суға шомылған 49 жастағы ер адам батып кетті, деп хабарлайды «Aqmola News» Ақмола облысы төтенше жағдайлар департаментінің баспасөз қызметіне сілтеме жасап.
Ер адам суға түсуге жабдықталмаған және тыйым салынған жерге суға шомылғаны анықталды.
«Бұланды аудандық төтенше жағдайлар бөліміне Макинск қаласына таман орналасқан жасанды су қоймасында ер адамның батып кеткені жайлы телефон хабарламасы түсті. Оқиға орнына дереу төтенше жағдайлар бөлімінің қызметкері жіберілген. Өкінішке орай қайғылы оқиғаның рас екендігі анықталды. Іздеу жұмыстарына төтенше жағдайлар департаментінің өрт сөндіру және апаттан құтқару жұмыстары бөлімінің 5 құтқарушысы, 1 жүзгіш құрал мен 1 техника бірлігі жұмылдырылды. 49 жасқа келген ер адамның не себепті батып кеткені әзірге белгісіз күйде қалып отыр, – деді Ақмола облысы төтенше жағдайлар департаменті бастығының міндетін атқарушы Манарбек Шапағатов.
Ақмола облысы төтенше жағдайлар департаментінің мәліметтері бойынша аталған жасанды су қоймасы суға шомылуға арнайы жабдықталмаған. Сонымен қатар, Макинск қаласына таяу орналасқан теміржол маңында суға түсуге тыйым салатын екі белгі де орнатылыпты. Су қоймасының тереңдігі үш метрден асатыны белгілі болды.
Естеріңізге сала кетейік, жыл басынан бері ғана Ақмола облысының су қоймаларында сегіз адам суға батып, 20 адам құтқарып алынды.
