Аудан орталығының мерейтойына орай Егіндікөл селосында нысандарды жөндеу және абаттандыру жұмыстары жасалмақ. Аталған мақсатта бюджет қоржынынан қыруар қаражат бөлінген, – деп хабарлайды «Aqmola news».
Бұл туралы Егіндікөл ауданының әкімі Ерлан Исабеков мәлім етті.
Жалпы Егіндікөл ауылының 50 жылдық мерейтойын өткізу бойынша онға жуық жоба жүзеге асырылмақ.
Ауылдың мерейтойы пандемия тұрақталған жағдайда тамыз айында өткізу жоспарланған. Егіндікөл ауылының 50 жылдығына орай, ауылға кірер жолда орналасқан стелланы қайта жаңартуды жоспарладық. Ауылымыздың мерейтойын өткізу уақытында, барша тұрғындар мен қонақтарды арнайы қарау алаңы бар, жаңа стелламен қарсы алмақпыз. Стелланы жаңартуға 7 миллион теңге қаржы жұмсалмақ. Сонымен қатар биыл мерейтой аясында Победа және Жамбыл көшелерінде екі көлік тұрағын абаттандыруды көздеп отырмыз. Победа көшесіндегі ағымдағы жөндеу кезінде тротуар бойына жаңа сауда дүңгіршектері де орнатылмақ. Бұл мақсатқа 1,4 миллион теңге қаржы қарастырылған. Ленин көшесінде де жаяулар жолы жөнделетін болады. Бұл мақсатта бюджеттен алты миллион теңге қаржы бөлінді, – деді Ерлан Исабеков.
Жөндеу жұмыстары шілде айының соңына дейін аяқталмақ.
