Шортанды кентінде мемлекеттік рәміздер күні құрметіне велошеру ұйымдастырылды. Велошеруді өткізудің тағы бір мақсаты – жастарды салауатты өмір салтына тәрбиелеп, аудан велоспортын дамыту,-деп хабарлайды «Aqmola News».
Қазақстан Республикасының Мемлекеттік рәміздері күніне арналған іс-шарада аудан әкімі Ғайдар Қасенов тәуелсіз Қазақстанның қалыптасу тарихын баяндай отырып, құттықтау сөз сөйледі:
«Бүгін біздің еліміз айтулы оқиғаны атап өтуде. 1992 жылдың 4 маусымында тұңғыш рет еліміздің Мемлекеттік рәміздері – Мемлекеттік Ту, Елтаңба, Әнұран қабылданды. Бұл егемендік пен тәуелсіздіктің, халық бірлігі мен мемлекеттік биліктің атрибуттары. Қазақстанның өз мемлекеттік рәміздерінің болуы тәуелсіз Қазақстанның қалыптасуындағы маңызды қадамдардың бірі,-деді Ғайдар Қасенов.
