Атбасар ауданының ауыл шаруашылығы тауар өндірушілері аудан әкімдігінің және «Нұр Отан партиясы филиалының бастамасымен Мақтаралға көмекке 20 тоннадан астам гуманитарлық азық-түліктер мен пен 1,9 миллион теңге қаржы жіберді, – деп хабарлайды «Aqmola news».
Бұл туралы Атбасар ауданының әкімі Аманбек Қалжанов мәлім етті.
Жүк көлігімен ұн, қант, қарақұмық, кеспе нан сияқты азық-түліктер мен жарты тоннадан астам жеке гигиеналық құралдар жөнелтілген.
Қайырымдылық шарасына Атбасар ауданындағы «Арип Агро», «Полтавка 2», «Алтын дән», «Атбасар Арман Агро», «Анаида», «Ащекуль», «Сепе», «Нан абыройы», «Шортанбай», «Новосельское», «Интертрайд», «Тілекей Агро», «Лана» АҚП» жауапкершілігі шектеулі серіктестіктері мен жеке кәсіпкерлер Б.Евлоев пен А.Мусиндер өз үлестерін қосып, елдегі қиын жағдайға іс жүзінде қолдау көрсетті.
Жаңа ғана 20 тонна азық-түлік пен тұрмыстық қажетті заттар тиелген гуманитарлық жүк Атбасар қаласынан Түркістан облысының су тасқынынан зардап шеккен Мақтаарал ауданына жөнелтілді. Судың «көкесін», қайғы-қасіретін 2014 пен 2017 жылдары көрген Атбасар тұрғындары мақтааралдықтарды жақсы түсінеді. Қиын-қыстау заманда қазақ халқы ауызбіршілік пен ынтымақтың арқасында барлық қиындықтарды жеңген. Жұмыла көтерген жүк жеңіл демекші, осындай көмекті ұйымдастыруға өздерінің үлестерін қосқан барша атбасарлық кәсіпкерлерге, жастарға шынайы алғысымызды білдіреміз! Мақтарал елінің тұрғындары, біз Сіздерде болған апатты естіп, Атбасар халқы сыртта қалған жоқ. Өйткені, Атбасар ауданында да осындай апатты жағдайлар екі рет болған. Сондықтан Сіздер қандай жағдайда екендіктеріңізді біз жақсы түсінеміз. Сондықтан Ақмола облысы, Атбасар ауданынан Мақтаралдағы жерлестерімізге көмек есебінде мына бір машинаны жіберіп отырмыз. 20 тонна гуманитарлық тамақ, ұн, қант, шай тағы да басқа тұрмысқа қажетті заттарды жөнелттік, игіліктеріңізге тұтыныңыздар,- деді аудан әкімі Аманбек Қалжанов.
Естеріңізге сала кетсек, Мақтарал ауданында Өзбекстанның су қоймасындағы дамбаның жарылуынан бірнеше елдімекендер су астында қалып, мыңдаған тұрғын баспанасынан айырылды. Өңірде техногенді сипаттағы төтенше жағдай жарияланған. Атбасар ауданы Мақтаралдықтарға осымен екінші рет гуманитарлық көмек жөнелтті. Осыған дейін 25 тонна ұн жіберілген.
