Көкшетауға «Сарыарқа Авто Пром» жауапкершілігі шектеулі серіктестігінен шығарылған дезинфекциялық автокөліктер жеткізілді, – деп хабарлайды «Aqmola news».
Абылай хан алаңында дезинфекциялық жаңа көліктердің техникалық сипаттамасы таныстыру шарасына облыс әкімі Ермек Маржықпаев та қатысты.
Өңір басшысы көліктің рөліне өзі отырып көріп, іс жүзінде оның мүмкіндігін байқап көрді.
Өте жақсы машина. Жабдықталуы қазіргі күрделі төтенше жағдай режимінде өте қажет. Бізді өзіміздің отандық тауар өндірушісін қолдауымыз және оның осындай өнім шығара алғаны қуантады, – деді Ермек Маржықпаев.
Өңірге қала көшелерін арнайы дезинфекциялық шашқыш құрылғымен жабдықталған барлығы 10 автокөлікке тапсырыс берілген.
Зауыт коронавирус инфекциясымен күрес мақсатында азғантай мерзімде Chevrolet Damas және Labo машиналары базасында дезинфекциялық машиналар жасап шығарды. Қазір олардың бірқатары еліміздің әр түкпіріне жөнелтілді, – деді зауыттың баспасөз қызметінен.
Дезинфекциялық көлікке жалпы 500 литр дезинфекциялық сұйықтық сиятын сыйымдылық орнатылған. Минутына 40 литр сұйықтықты шашатын көлік бір өткенде 4 метр аумақты қамтиды.
