Көкшетауда коронавирусқа қашан ақылы талдау жасауға болатыны белгілі болды. Бұл туралы өңірлік коммуникациялар қызметінде өткен брифинг барысында Ақмола облысы денсаулық сақтау басқармасының басшысы мәлімдеді – деп хабарлайды «Aqmola news» ақпарат агенттігі.
Өңірдің денсаулық сақтау басқармасының басшысы коронавирус инфекциясын жұқтырған 4 науқастың жағдайы туралы тың мәліметтер берді.
Олардың бәрі Қосшы ауылының тұрғындары. Науқастар облыстық туберкулезге қарсы диспансерге орналастырылған, – деді Сүлен Ілиясов.
Басқарма басшысы сонымен қатар коронавирус инфекциясына тұрғындардың қашан тестілеу жасауға болатыны жөнінде тоқталды.
Қазір тестілеу тек індет жұқтырған адамдармен байланыста болған адамдарға ғана жүргізілуде. Бұл әрине тегін жүргізіледі. Қазіргі таңда ақылы негізде тестілеу өткізуге ниет білдіргендер үшін арнайы жабдықтары мен материалдары пайда болған «Олимп» зертханалар жүйесімен келіссөздер жүргізіліп жатыр, – деді Сүлен Ілиясов.
Егер келіссөздер оң нәтижесін берсе көкшетаулықтар келесі аптаның басында ақылы негізде коронавирус инфекциясына тест тапсыра алады.
