Халықаралық әйелдер мерекесі қарсаңында елордалық волонтерлер «Көктем шуағы» акциясын өткізді.
Акция қала халқы көп шоғырланған «Астаналық» сауда орталығы мен «Тұлпар» сауда үйінің іргелес аумағында өтті.
Волонтерлер сауда орталығының қызметкерлерін мерекемен құттықтап, ізгі тілектерін білдірді. Акцияға 20 ерікті қатысты, олардың ішінде кәсіпкерлікпен айналысатын волонтерлер де бар. Волонтерлер көктемгі мерекеде әйел азаматтарға жақсы көңіл-күй сыйлау арқылы ерекше әсерге бөленгендерін атады.
– 8 наурыз ерекше мейрам. Көктем мерекесі. Біздің акциямыз ардақты аналарға, апа-қарындастарға, барлық әйелдер қауымына арналады. Гүл сыйлап тұрған алғашқы секундтарда қыздар таңданып, сенімсіздікпен қарайтын. Кейіннен қуанып, осылай көңіл бөлгенімізге алғыстарын білдіріп жатты, – деді елордалық волонтер Адилет Байбосынов.
Акция 8 наурызға дейін созылады және волонтерлер гүлді коммуналдық сала қызметкерлеріне, мәдениет, медицина және әлеуметтік сала қызметкерлеріне, сондай-ақ, түрлі сала мамандарына таратады.
