Шығыс Қазақстан облысында автобус пен жүк көлігі соқтығысып, соның салдарынан 8 жасөспірім жарақат алды. Қоғамдық көліктің ішінде жарысқа бара жатқан балалар болғаны анықталды деп хабарлайыды Aqmola News ақпарат агенттігі NUR.KZ.-ке сілтеме жасап.
Облыстық полиция департаментінің баспасөз қызметі жол көлік оқиғасы Прапорщиково елді мекені маңында болғанын хабарлады. Бұл ауыл Глубокое ауданында орналасқан.
Балалар Шығыс Қазақстан облысының орталығынан Шемонаиха ауданына қарай спорт жарысына қатысу үшін шыққаны белгілі болды.
Оларды полиция қызметкерлері ертіп жүрген.
Алдын-ала болжам бойынша, автобус жүріп келе жатқан уақытта кенеттен жолдың қарсы бетінде келе жатқан Howo жүк көлігі шығып, транспорттар соқтығысыпты.
Оқиға орнына дәрігерлер мен құқық қорғау органдарының қызметкерлері келген. Жол көлік апаты салдарынан зардап шеккен 8 жасөспірім ауруханаға жеткізілді. Қайтыс болғандар жоқ.
Қоғамдық көлікте 53 адамның болғаны, олардың 46-сы балалар екендігі анықталды.
Тәртіп сақшылары тексеру жұмыстарын жүргізуде.
