Ақмола облысының Есіл аудандық ауруханасына 73 миллион теңгенің медицина жабдығы сыйға берілді. Аудан ауруханасының ұжымына бұл жақсылықты жасаған Болат Өтемұратовтың қоры,- деп хабарлайды Aqmola News ақпарат агенттігі облыстық денсаулық сақтау басқармасына сілтеме жасап.
Шараға Ақмола облысы әкімінің орынбасары Айна Мысырәлімова, қор директоры Марат Айтмағамбетов, Есіл ауданының әкімі Серік Балжанов, медицина қызметкерлері және жергілікті тұрғындар қатысты.
-Аурухана реанимобиль, хирургия бөлімшесі заманауи наркоз-тыныс алу аппараты және жансақтау бөлімшесі жаңа туған нәрестелерді қарқынды емдеуге арналған инкубатормен толығып отыр. Бұл аудан тұрғындарына медициналық қызмет көрсету сапасын арттырады, – деді Айна Мысырәлімова.
Біз науқастарды тасымалдау үшін заманауи реанимобильге мұқтаж едік. Енді біз Көкшетау мен Нұр-Сұлтан қалаларына медициналық көмектің жоғары деңгейі қажет патологиясы бар жүкті және ауыр жарақаттары бар науқастарды тасымалдай аламыз. Тасымалдау едәуір жылдамырақ жүзеге асып, дәрігерге қажеттінің бәрі қол астында болады, – деді аудандық ауруханасының бас дәрігері Дастан Асанұлы.
