Ақмола облысы Державинск қаласында «Бастау-Бизнестің» екінші бағыты бойынша курстың қатысушысы Жансая Алмуханова 2 жастан 8 жасқа дейінгі балаларға арналған ойын алаңын ашты,-деп хабарлайды Aqmola News ақпарат агенттігі.
Ол өткен жылдың сәуір айында 250 мың теңгелік сертификат ұтып алған болатын. Бұл қаржыға салтанат залдарын безендіруге арналған агенттік жұмысын бастаған еді. Жансаяның кәсіпкерліктегі бұл қадамы аудан үшін де жаңа бастама болып отыр.
«Бастау» қатысушысы бір бағытта тоқтамауды ұйғарып, Жарқайың аудандық кәсіпкерлер палатасынан 2 миллион теңгеге жуық несие алды.
Бұл қаражатқа кәсіпкер арнайы ойын аймағын, соған сәйкес жабдықтар мен ойыншықтар сатып алды. Сондай-ақ, балалардың қызығушылығы үшін анимациялық қызметтер мен балаларға арналған түрлі мерекелер ұйымдастыруды да жоспарлап отыр.
