Жарқайың ауданында биылғы жылы 5,4 миллиард теңгенің инвестициялық жобалары жүзеге асырылады. Бұл қаражатқа сүт өндіретін цех, элеватор, балалардың ойын-сауық орталығы, астық қабылдау кәсіпорнын іске қосу да кіргізілмек,-деп хабарлайды Aqmola News ақпарат агенттігі.
Жуырда аудан әкімі Мұрат Балпан ӨКҚ-де журналистермен кездесу жиынында аудан экономикасы үшін инвесторларды тарту жұмысы биыл да қолға алынатынын айтқан болатын. Нәтижесінде Державинск қаласында биылғы жылғы жоспарға енгізілген инвестициялық жоба іске қосылып, жаңадан салынған «Ажар» мейрамханасы өз қонақтарына есігін айқара ашты.
Екі қабатты ғимараттың бірінші қабатында бизнес орталығы, «BABY LAND» балалар ойын алаңы, тігін шеберханасы орналасқан. Бұл инвестициялық жобаның құны 70 миллион теңгені құрайды. Қазіргі заманғы үлгідегі тойхана 200 орынға есептелген.
